من سلطان الغامدي إلى كل عضو بالمنتدى

[stn555]

بسم الله الرحمن الرحيم

أبدا بالسلام على كل عضو / عضوة بالمنتدى

السلام عليكم ورحمة الله وبركاته وبعد

سوف اتغيب عن المنتدى لمدة شهر تقريبا بمناسبة زواجي بمشئية الله تعالى يوم 11/6

وانا تارك المنتدى بين أيدي امينة تحافظ على نهجه واسلوبه العناية به خلال هذه الفترة كلي ثقة بذلك

ولا تنسوني من الدعاء بالتوفيق والسداد وان الله يتمم لي على خير ويكتب لي ولكم السعادة في الدنيا

والاخرة ........وفي الختام اتقدم اليكم بالشكر والعرفان على كل ما تقدموه من مشاركات اكثر من

رائعة ومفيدة وتصب في مصلحة الجميع ومن تعاون بناء بين الكل وهذا هو الهدف الاساسي للمنتدى


اخوكم سلطان الغامدي

[همسات]

الف مبروك استاذ سلطان

وبتوفيك انشاء الله

[نوني80]

إن شاء الله الله يوفقك أخي سلطان
و ألف ألف مبروك

[البـدر]

بارك الله لكما وبارك عليكما وجمع بينكما في خير

[دنيا الأمل]

الف الف مبروك استاذ سلطان

الله يوفقك ويسعدك في الدنيا والأخرة

[ata]

ألف مبروك //

أسأل الله لك التوفيق , في حياتك اخوي الغالي ( سلطان الغامدي )

[mooof]

الف الف الف مبروووووووووووووووووك .

[روح الياسمين]

الف الف مبروك استاذ سلطان
بالتوفيق انشاء الله

[stn555]

اشكر الجميع على مرورهم وتبريكهم لي والله يوفقك الجميع

[mooof]

نصيحة موجهه للمقدمين على الزواج ( ثلاثة من زملائي بيتزوجون بالصيفية الله يوفقهم ).
لاتنسى قاعدة مهمة جدا اسمها gold year , وهي تمتد من سنة إلى سنتين عيشوا حياتكم فيها سافروا روحوا للمطاعم ان حبيتوا يوم ورا يوم ........ وبعدها فكروا بالأطفال , لأنه من خلال التجربة مع الكثير ممن تزوجوا سابقا ثبت أن من مر بالقولد يير افضل حالا ممن انشغل ببداية حياته الزوجية بمراجعة المستشفى وانتظار تشريف الضيف الجديد .
طبعا النصيحة هذي وجهتها لزملائي بالمدرسة وكانت محل نقاش واسع بين اطياف متعددة بغرفة المدرسين وقت الفسحة ووجدت قبولا لدى نسبة كبيرة منهم .
لها سلبيات وايجابيات لايتسع المقام هنا لشرحها ولكن حبيت اقدمها لك كهدية بمناسبة زواجك وبتدعيلي على هالنصيحة .
ثانيا : اذا طُلب منك طلب معين لاتعطي موافقة سريعة أو رفض سريع , انتبه بالك .
اذا انت تشرب شاي أو تقرأ جريدة قل : يكون خير نشرب الشاي ويكون خير
ساعتها يمديك تفكر وتشوف وتقيس امورك هل انت مشغول ولا لا , تقدر تنفذ طلبها ولا لا .
ثالثا : اذا كان واحد منكم معصب مرة بسبب مشكلة او مشادة بينكم لاتناقشونها وانتم معصبين لأن كل واحد منكم بيتعصب لرأية حتى لوكان على خطأ , الأفضل أن ينسحب احد الطرفين بالحال ويبتعد عن ارض المعركة وينبه الطرف الآخر على ضرورة تأجيل النقاش لوقت آخر حتى تهدأ النفوس ويكون نقاش هادئ متزن الهدف منه الوصول لنتيجة مرضية للطرفين .
رابعا : لاتنسى تحفر حفرة كبيرة في بيتك والأفضل إنها تكون في غرفة النوم وتوريها المدام وتقول لها هذي حفرة المشاكل , أي شي أو مشكلة بيني وبينك ندفنها هنا قبل لانطلع من الغرفة , لأن المشاكل مهما كانت صغيرة أو بسيطة اذا خرجت برا البيت حتى لو لأهلك أو اهلها راح تكبر أكثر وأكثر ويصعب السيطرة عليها .
خامسا : لاتتوقع من الزوجة الكثير في بداية حياتكم الزوجية , يعني لاتتصور انها جاية من بيت اهلها وهي تعرف تطبخ وتنفخ وتضبط امورك وتكوي شماغك على اروع مايكون , بالعكس تلقاها في اهلها الشغالة تباريها وكل طلباتها مجابة عشان كذا خذها بصدر رحب , ولا تدقق على طبخها او كويها او غسيل هدومك بالعكس شجعها قد ماتقدر وقلها الله ياسلام على طبخة اليوم تجنن بس لو زدتي الملح شوي كان افضل ومن هالكلام اللي يرفع المعنويات وشوي شوي اللين تلقاها بعد كم شهر ربة بيت حقيقية وبالك تحطها في مقارنة مع امك في الطبخ تراك انت الخسران هههههههههههه
ومن وقت لوقت فاجئها بوردة أو عطر أو أو أو مو شرط يكون غالي سعره لا لالالالالا , المهم تختار التوقيت المناسب لتقديمه مع انتقاء العبارات المناسبة أثناء تقديمها .
سادسا :
اياني واياك تجيب مشاكل العمل للبيت , يعني بعض الأزواج أول مايخش البيت ويلقى زوجته مازهبت القهوة أو الغدا أو لقاها تكلم امها بالتلفون فتح الرشاش وبدا يفرغ المشاكل اللي تواجهة في عمله من مديرة أو زملائه ويفرغها على راس زوجته لأنها الحلقة الأضعف . تلقى المسكينة فاتحة اثمها ماتدري وش القصة وهو فاتح هالحنجرة ورافع المكرفون وهات ياتفريغ على كيف كيفك , هو مسكين لأنه مايدرك إن اللغم اللي فجره في وجه زوجته مهوب بسبب مكالمتها لأمها أو لأنها مازهبت القهوة أو الغدا لالالالالالالا بل بسبب مديرة عشان كذا عقلة اللا باطن يحاول التخلص من هالحمل الرهيب والضغط الزايد ويستخدم طريقة دفاعية للتفريغ وتكون موجهة للحلقة الأضعف وهي الزوجة وعشان تنجح حيلة العقل اللا باطن لازم يلقى مبرر ولو تافه وخطأ ولو كان بسيط عشان يقدمه لعقله الواعي ويقوله شف وش سوت هاللي ماتستحي وش سوت أنا اشتغل واتعب وارجع من العمل والقاها تبربر ولا صلحت الغدا , همين عقله الواعي يصدق هالمبرر ولايدرك خدعة عقلة اللا باطن .
سابعا :
حدد عدد زيارات زوجتك لأهلها لاتخلي الدعوة سبهللة , لأنك بتتعب بعدين قصدي بعد كم سنة ,
الأفضل مرة بالأسبوع .
ثامنا :
سلم زوجتك مكافأة شهرية عشان تقضي لزومها ويفضل زيادة المكافأة كل سنة وفهمها إن لها مطلق الحرية في التصرف بها , بتشتري هدية بتوجب قريبة بتتصدق بها بتجمعها على كيفها بس لاتطلبين مني كل شوي فلوس . بكذا بتريح راسك وتنفك من كثرة العزايم وكل اسبوعين هات الفين بفصل أو بشتري فستان بمناسبة زواج فلانة أو عزيمة فلانة . ( المكافأة قابلة للقطع بعكس الراتب هههههه )
تاسعا :
كل كم شهر غير روتين البيت شوي يعني , اكسر الملل , غيروا ترتيب الكنب بالصالة غيروا مكان التلفزيون غيروا اي شي المهم تحسون بالتجديد وكسر الرتابة اللي انتم عليها .
عاشرا :
اول 6 اشهر من الزواج تكون الزوجة قابلة للبرمجة يعني تكون جاية لعالم غريب وجديد عليها وتكون جاية محملة بنصايح طويلة عريضة من امها واخواتها وقريباتها بحسب خبرة كل وحدة في الحياة , لذلك معظم الأزواج خلال هذه الفترة يجاملون بعضهم ويضغطون على انفسهم ويحاولون يظهرون انفسهم انهم بلاعيوووووووب وهذا خطأ جسيم , الأفضل إن كل واحد يبين للآخر وش يحب وش يكره ويبين عيوبه للآخر ......... الظاهر اني معرفت اشرح هالفقرة لأن وقت صلاة المغرب حان بالرياض .
شكرا للجميع .
مووووووووووووووووووووووف